ސޫރިއާގެ މުސްލިމުންގެ ހާލަތު ހަނދުމަނެތި ނުކުރައްވާށެވެ

 ލިޔުއްވީ: އައްޝައިޚް އާދަމް ޝަމީމް ބިން އިބްރާހީމް

بسم الله الرحمن الرحيم

اللهم انصر الإسلام والمسلمين ودمر أعداءك أعداء الدين “ހައްދަވާ ބޮޑުކުރެއްވި ރަސްކަލާކޮ! އިސްލާމް ދީނާއި މުސްލިމުންނަށް ނަޞްރު ދެއްވާންދޭވެ! އަދި އިބަރަސްކަލާނގެ އާއި އިބަރަސްކަލާނގެ ދީނުގެ ޢަދާވާތްތެރިން ހަލާކު ކުރައްވާންދޭވެ!”

އަޅުގަނޑުމެން އިރުކޮޅަކުން ހަނދާންނެތެއެވެ. އަމިއްލަ، ދާޚިލީ ކަންކަމާ ހެދި އަޅުގަނޑުމެންގެ މުސްލިމު އަޚުންނާއި އުޚްތުންގެ މަތިން ހަނދާނެއް ނުހުރެއެވެ. ބައެއް މީހުނަށް ތިމާމެން ނޫން ބަޔަކު ދުނިޔޭގައި އުޅޭކަންވެސް ނޭންގޭ ކަހަލައެވެ. އެކަމަކު ދުޝްމަނުން ހުއްޓާނުލައި މުސްލިމުންނާއި މި މާތް ދީން ނިކަމެތި ކުރެވޭތޯ މަސައްކަތް ކުރެއެވެ.

މި ދީނުގެ ދުޝްމަނުން އަބަދުވެސް ކޮންމެވެސް ތަނެއްގައި މުސްލިމުންނާއި އިސްލާމް ދީީނުގެ ހުރުމަތް ކަނޑަމުން ގެންދެއެވެ. މި އަހަރު ފެށިގެން އައި އިރުގައި މިގޮތަށް މުސްލިމުންނަށް ލާ އިންސާނީ އަނިޔާ ދެމުން އައިސްފައިވާ އެއް ތަނަކީ ސޫރިއާ އެވެ. ސޫރިޔާ އަކީ މާތް ﷲ މާތް ކުރައްވާފައި ވާ ޝާމް ކަރައެވެ. ރަސޫލުންނާއި ނަބިއްޔުންނާއި މި އުންމަތުގެ އެތަކެއް ބޮޑެތި ޢިލްމުވެރިންގެ ނުކުމެފައިވާ ބިމެވެ. ނަމަވެސް ޢުޘްމާނީ ޚިލާފަތް ވެއްޓުމާއި އެކުގައި ފަރަންސީ އިސްތިޢުމާރީންގެ އެހީގައި ސޫރިޔާ އާއި ލެބްނާން ފަދަ ޝާމްގެ ބައިތަކަށް ޝީޢައިންނަށް އަތްގަދަ ކުރުމުގެ ފުރުސަތު ލިބިފައި ވެއެވެ.

އިޒްރޭލުން ފަލަސްޠީނުގެ ރަށްތަކަށް ހަލާކުވެފައިވާ މަހުގެ ބާވަތްތައް އެތެރެކުރަނީ

 ލިޔުނީ: އަލްޖައްރާހީ

އިޒްރޭލުން ފަލަސްޠީނުގެ ހުޅަނގު އައްސޭރި އާއި ޣައްޒާއަށް ޞިއްޙަތަށް ގެއްލުން ހުރި ހަލާކުވެފައިވާ މަހާއި ކާބޯތަކެތީގެ އެހެނިހެން ބާވަތްތައް ވަރަށް ގިނަ ޢަދަދަކަށް އެތެރެކުރަމުން ގެންދާކަމަށް ފަލަސްޠީނުގެ ކާބޯތަކެއްޗާ ބެހޭ އިދާރާއިން ހާމަކޮށްފިއެވެ. 

ހުޅަނގުއައްސޭރި އާއި ޣައްޒާގައި "ކޮންޒިޔުމަރުންގެ ޙައްޤުތައް" ރައްކާތެރިކުރުމަށް މަސައްކަތްކުރާ ޖަމްޢިއްޔާއަކުން ދާދިފަހުން ނެރިފައިވާ ރިޕޯޓުގައިވާގޮތުން ގިނަ ދުވަސްވުމުގެ ސަބަބުން ހަލާކުވެފައިވާ ކާބޯތަކެތީގެ ބާވަތްތައް ހުޅަނގުއައްސޭރި އާއި ޣައްޒާއަށް އިޒްރޭލުން އެތެރެކުރަމުން ގެންދަނީ އެޤައުމުގެ ތަފާތު ބަނދަރުތައް ބޭނުންކޮށްގެންނެވެ. އަދި އިޒްރޭލުގެ ކަސްޓަމްސް އޮފިސަރުންނާއި ކާބޯތަކެތީގެ ފެންވަރުބެލުމަށް ޙަވާލުވެ ތިބޭ އޮފިޝަލުންގަސްތުގައި ކާބޯތަކެތި ޗެކްކުރުމުގައި ފަރުވާކުޑަކުރާކަމަށާއި  ކަނޑުމަހާއި ކުކުޅާއި އެހެނިހެން ބާވަތްތަކުގެ މަސްވެސް އެތައް މަހެއް ވަންދެން އިޒްރޭލުގެ ތަފާތު ބަނދަރުތަކުގައި ބެހެޓުމުގެ ސަބަބުން ހަލާކުވުމަށްފަހު ފަލަސްޠީނުގެ އެކި ސަރަޙައްދުތަކަށް އެތެރެކުރަމުން ގެންދާކަމަށް ވެސް އެރިޕޯޓްގައިވެއެވެ.

އިޒްރޭލުން ދިން ވައިގެ ހަމަލާއެއްގައި ފަލަސްޠީނުގެ މީހަކާއި އޭނާގެ ތުއްތު ދަރިފުޅު ވަރަށް ބޮޑަށް ޒަޚަމްވެއްޖެ

 ލިޔުނީ: އާދަމް ޔަޢީޝް

މިދިޔަ އާދީއްތަ ދުވަހުގެ ފަތިހުު ޣައްޒާ ސަހަރުގެ އިރުމަތީގައި ހުރި ގެއަކަށް އިޒްރޭލުން ދިން ވައިގެ ހަމަަަލާއެއްގައި ފަލަސްޠީނުގެ މީހަކާއި އޭނާގެ ތުއްތު އަންހެން ދަރިފުޅަށް އެކިވަރުގެ އަނިޔާތައް ލިބި ވަރަށް ބޮޑަށް ޒަޚަމްވެއްޖެއެވެ.

"ޕަލަސްޓީނިއަން އިންފޮމޭޝަން ސެންޓަރ" ގެ ރިޕޯޓަރެއް ބުނިގޮތުގައި އިޒްރޭލުގެ ހަނގުރާމަމަތީ ބޯޓުތަކުން ވަނީ ޣައްޒާގެ އިރުމަތީ ސަރަޙައްދުގައި ހުރި ގެއަކަށް އަމާޒުކޮށް ތިން މިސައިލް ފޮނުވާލާފައެވެ. އެ ގެއަކީ ޙަމާސް ޖަމާޢަތުގެ އަސްކަރީ ގޮފިކަމުގައިވާ "އަލްޤައްސާމް ބްރިގޭޑް" ގެ ކޮމާންޑަރެއްކަމުގައިވާ ޢިމާދް ޢަޤްލް ގެ ގެއެވެ.

ދުޢާކުރުން އެންމެ ރަގަޅު ވަގުތުތަކަކީ ކޮބައިތޯއެވެ؟

ޖަވާބުދެއްވީ: އައްޝައިޚް އާދަމް ޝަމީމް އިބްރާހީމް

ސުވާލު: ދުޢާކުރުން އެންމެ ރަގަޅު ވަގުތުތަކަކީ ކޮބައިތޯއެވެ؟ 

ޖަވާބު: الحمد لله، والصلاة والسلام على رسول الله أما بعد:

ދުޢާކުރުން އެއްމެ ރަނގަޅު ވަގުތުތަކަކީ އެވަގުތުތަކުގައި ދުޢާ އިޖާބަ ކުރެއްވުން ގާތްކަމުގައި ﷲ އާއި އެކަލާނގެ ރަސޫލާ އަންގަވާފައިވާ ވަގުތު ތަކެވެ. އެފަދަ ވަގުތު ތަކުގެ ތެރޭގައި އެއްވަގުތަކީ: ލައިލަތުލް ޤަދްރި ވިލޭރެއެވެ. އަނެއްވަގުތަކީ: ރޭގަނޑުގެ ދަންވަރެވެ. އެއީ ރޭގަނޑުގެ ތިންވަނަ ބައި ނުވަތަ ހާރު ދަން ފެށުނީއްސުރެ ފަޖުރުލައިފުމަށް ދާނދެނެވެ. އެއީ ﷲ ތަބާރަކަ ވަތަޢާލާ ދުނިޔޭގެ އުޑަށް ނުޒޫލުވެ ވޮޑިގެން އެކަލާނގެ އަޅުތަކުންގެ ދުޢާ އާއި ދެންނެވުންތައް އިޖާބަކުރައްވާނެކަމުގައި އަންގަވާފައިވާ ވަގުތެވެ.އަނެއްވަގުތަކީ: ބަންގިއާއި ޤަމަތާއި ދެމެދުގައި ކުރެވޭ ދުޢާއެވެ.އަނެއްވަގުތަކީ: ނަމާދުގައި ސަޖިދާގައި އޮންނަ އިރުއެވެ.އަނެއްވަގުތަކީ: ފަރުޟު ނަމާދު ފަހަތުގައެވެ. ޔަޢުނީ: އައްތަޙިއްޔާތާއި ޞަލަވާތް ކިޔެވުމަށް ފަހުގައި ސަލާންދިނުމުގެ ކުރިން ދުޢާ ކުރުމާއި ސަލާމްދިނުމަށް ފަހުގައި ކުރެވޭ ޛިކުރުތަކާއި ދުޢާތަކެވެ. އަނެއްވަގުތަކީ: ހުކުރު ދުވަހުގައި ވާ ދުޢާ އިޖާބަ ކުރެއްވޭ ސާޢަތެވެ. އެއީ ހުކުރު ވަގުތުން ފެށިގެން އިރު އޮށްސުމާއި ދެމެދުގެ ވަގުތެކެވެ.އަނެއްވަގުތަކީ: ވާރޭ ވެހޭ ވަގުތެވެ.އަނެއްވަގުތަކީ: ޒަމްޒަމް ފެން ބުއިމާއި އެކުގައި ކުރާ ދުޢާއެވެ.އަނެއްވަގުތަކީ: އަނިޔާ ލިބިގެންވާ ހާލުގައި މަޡްލޫމުންގެ ދުޢާއެވެ.

ރަޝިޔާގެ އެހީގެ ޤާފިލާ ޣާޒާއަށް ވަދެއްޖެ

ލިޔުނީ: އިނާޒް ޢަދުނާން

އެހީގެ ސާމާނު ހިފައިގެން ޣާޒާއަށް ދަތުރުކުރި ރަޝިޔާގެ ޤާފިލާ މިދިޔަ ބުރާސްފަތި ދުވަހު ރަފަހު ބޯޑަރު ހުރަސްކޮށް ޣާޒާއަށް ވަދެއްޖެއެވެ.

މިޤާފިލާއިން ޣާޒާއަށް އެހީގެ ގޮތުގައި މައިގަނޑުގޮތެއްގައި ގެންގޮސްފައިވަނީ މިވަގުތު ޣާޒާ ސިޓީގެ ޞިއްޙީ ޚިދުމަތްދޭ ތަންތަނުން ހުސްވަމުންދާ ބޭހާއި ބޭސްފަރުވާާ ދިނުމުގައި ބޭނުންކުރާ ސާމާނެވެ. މިއީ ޣާޒާގެ ހިޞާރުކުރެވިފައިވާ މުސްލިމުންނަށް އެހީވުމަށްޓަކައި މިބާވަތުގެ ޤާފިލާއެއް ރަޝިޔާއިން ދަތުރުކުރި ފުރަތަމަ ފަހަރެވެ. ރަޝިޔާގެ މުސްލިމުންވަނީ މިދިޔަ ރަމަޟާންމަހު ޣާޒާގެ ރައްޔަތުންނަށް އެހީވުމަށްޓަކައި ޚާއްޞަ ކެމްޕޭނެއް ހިންގާފައެވެ. މޮސްކޯގައި ޖަމާކުރެވުނު އެފައިސާއިން ބޭސް ގަތުމަށްފަހު ޣާޒާގެ ރައްޔަތުންނަށް މީގެ ކުރިންވެސް ވަނީ ފޮނުވާފައެވެ.

އެފަދަ ބޭބެއަކަށް ވެވޭނެ ނަމަ

ތަރުޖަމާ: އާދަމް ޔަޢީޝް

ޝުޢައިބް އަށް ޢީދު ދުވަހު އޭނާ ބޭބެގެ ފަރާތުން ވަރަށް އަގު ބޮޑު ރީތި ކާރެއް ހަދިޔާއަކަށް ލިބުނެވެ.  އެއްދުވަހަކު ޝުޢައިބް ގެއިން ބޭރަށް ނުކުތްއިރު އަވަށުގައި އުޅޭ ކުއްޖަކު ޙައިރާންކަމާއެކު އެ ކާރަށް ތަޢުރީފުގެ ނަޒަރަކުން ބަލަންހުރިތަން އޭނާ އަށް ފެނުނެވެ. އެކުއްޖާ އަށް ޝުޢައިބް ފެނުމާއެކު އަހާލިއެވެ.   [ބޭބޭ؟ މިއީ ބޭބެ ގެ ކާރެއްތަ؟] 

ޝުޢައިބް އާނއެކޭ ބުނުމުގެ ގޮތުން ބޯ ޖަހާލިއެވެ. [ތިއީ އަހަރެންގެެ ބޭބެ ޢީދު ހަދިޔާއެއްގެ ގޮތުން އަހަރެންނަށް ދިން އެއްޗެއް.] 

ޝުޢައިބްގެ ޖަވާބު އިވުމުން އެކުއްޖާގެ ހައިރާންކަން އިތުރުވެގެން ދިޔައެވެ. [ތި ބުނީ ބޭބެގެ ދޮންބެ، ބޭބެ އަށް ޢީދު ދުވަހު ހަދިޔާއަކަށް ކާރެއް ދިނީއޭތަ؟ އަހަންނަށްވެސް.....] މިހިސާބަށް ބުނުމަށްފަހު އެކުއްޖާ ވާހަކަދެއްކުން ހުއްޓާލިއެވެ.

މޯބައިލްފޯން ފަދަ ތަކެތީގައި ކީރިތިޤުރުއާން ގެންގުޅުމުގެ ޙުކުމަކީ ކޮބާ؟

ޖަވާބުދެއްވީ: އައްޝައިޚް އާދަމް ޝަމީމް ބިން އިބްރާހީމް

ސުވާލު:  މޯބައިލްފޯން  ފަދަ  ތަކެތީގައި ކީރިތިޤުރުއާން  ގެންގުޅުމުގެ  ޙުކުމަކީ  ކޮބާ؟

ޖަވާބު: الحمد لله، والصلاة والسلام على رسول الله

أما بعد:

ކޮމްޕިއުޓަރއާއި މޮބައިލް ފޯން ފަދަ އިލެކްޓްރޯނިކް ޑިވައިޒްތަކުގައި ކީރިތި ޤުރްއާން އަޅައިގެން ގެންގުޅުމާއި އަޑުއެހުމާއި އެފަދަ ތަކެތިން ޤުރްއާން ކިޔެވުމަކީ ހުއްދަ ކަމެކެވެ. އަދި އެފަދަ އެއްޗިހީގައި ބީހުމަށްޓަކައި ވުޟޫ ހުރުމަކީ ޝަރުޠެއް ނޫނެވެ. އަދި އެފަދަ ތަކެތި ޖީބުގައި އުފުލުމާއި އެއާއި އެކުގައި ފާޚާނާއަށް ވަދެ ހެދުމަކީ ހުއްދަ ކަމެކެވެ. ސަބަބަކީ އެއީ މުޞްޙަފެއް ނޫނެވެ. ހަތިމެއް ނޫނެވެ. އަދި އޭގައި ވާ ލިޔުމަކީ ކަރުދާހުގައި ވާފަދަ އެއްޗެއް ނޫނެވެ. އެލިޔުން އެއްޗެއްގެ ގޮތުގައި ފެންނަނީ އެ ހުޅުވައި ސްކްރީންގައި ޑިސްޕްލޭ ކުރުމުންނެވެ. ނިތްވައިލުމުން އޭގެ ހަގީގަތް ގެއްލިދެއެވެ. ވީމައި ޤުރްއާން ޖަހައިގެން ނުވަތަ ޤުރްއާން ޓެކްސްޓް ހުޅުވައިފައި ބާއްވައިގެން ފާޚާނާފަދަ ތަންތަނަށް އެއާއި އެކުގައި ވަނުމަކީ ރަނގަޅުކަމެއް ނޫނެވެ. އެކަމަކު ނިތްވައިލުމުން އެއީ މައްސަލައެއް ނޫނެވެ

ހުޅަނގުގެ އަންހެނުން މަސައްކަތަށްނެރެވުނު ގޮތަށް ނަޒަރެއް - 4

އަސަރުތައް

ކުރިންވެސް ބަޔާންކުރެވުނު ފަދައިން މަންމައިން މަސައްކަތަށް އެނބުރި ދާންފެށުމުން، ޓީވީ ހިމެނިގެންދިޔައީ ޅަދަރީންގެ "ބެލެނިވެރިޔާ" ކަމުގައެވެ. 1950 ގެ އަހަރުތަކުގައި ކުޑަކުދިން ހޭލާ ތިބޭ ވަގުތުގެ ތެރެއިން އެންމެ ގިނަ ވަގުތު ހޭދަކުރަނީ ޓީވީގެ ކުރިމަތީގައެވެ. 

1940 ވަނަ އަހަރު 18 އަހަރުންދަށުގެ ދަރީން ތިބި މައިންގެ ތެރެއިން މަސައްކަތަށް ދާކަމަށް ރެކޯޑްކުރެވިފައިވަނީ %8.6 އަށްވުރެވެސް މަދު ޢަދަދެއްގެ އަންހެނުންނެވެ. ނަމަވެސް 1987 ވަނަ އަހަރާ ހަމަޔަށް އައިއިރު މިނިސްބަތްވަނީ %60.2 އަށް މައްޗަށް އުފުލިފައެވެ.

މައްޔިތާގެ މޫނު ބަލަން ދިއުމަކީ ކޮންކަހަލަ ކަމެއް ތޯއެވެ؟

ޖަވާބު ދެއްވީ: އައްޝައިޚް އާދަމް ޝަމީމް ބިން އިބްރާހީމް

ސުވާލު: މައްޔިތާގެ މޫނު ބަލަން ދިއުމަކީ ކޮންކަހަލަ ކަމެއް ތޯއެވެ؟

ޖަވާބު: الحمد لله، والصلاة والسلام على رسول الله. أما بعد: 

މައްޔިތާގެ މޫނުބެލުމަކީ އޮންނަ ކަމެކެވެ. އިތުރު އެކަލޭގެފާނުން އަވަހާރަވެ ވަޑައިގަތުމުން މުސްލިމުން އެކަލޭގެފާނުންގެ މޫނު ބެލުމަށްޓަކައި އެކަލޭގެފާނުންގެ ގާތަށް ވަދެ، އެއްމެ ފަހު ފަހަރަށް އެކަލޭގެފާނު ދެކިލައި ބައްދަލު ކުރިއެވެ. ވީމައި ގާތް ތިމާގެ ނުވަތަ އަވަށްޓެރިންނާއި ރަހުމަތްތެރީން ނިޔާވުމުން އެމީހުންގެ މޫނު ބެލުމަށް ދިޔުމަކީ އޮތް ކަމެކެވެ. ނަމަވެސް ހިލޭ ފިރިހެނުންނާއި ހިލޭ އަންހެނުން އެއްބަޔަކު އަނެއް ބައެއްގެ މޫނުބެލުމަކީ އޮތްކަމެއް ނޫނެވެ. ޚާއްސަކޮށް އަންހެނުންގެ މޫނުބެލުމަށް ފިރިހެނުން ދިޔުމަކީ ރަނގަޅުކަމެއް ނޫނެވެ. އަދިކިޔެއް ޖަނާޒާގައި ބައިވެރިވެ މައްޔިތާގެ މައްޗަށް ކަށުނަމާދު ކޮށް ދުޢާ ކުރުމުން އެ ނިމުނީއެވެ.

އިމާމް އަޥްޒާޢީގެ ހިތްވަރުފުޅު

ޢަބްދުﷲ ބިން ޢަލީ ޢައްބާސީ ދިމިޝްޤު ފަތަޙަކުރުމަށްފަހު އެންމެ ގަޑިއިރެއްގެ ތެރޭގައި އެއްވެސް ޙައްޤަކާނުލައި އެތައް ބައެއްގެ ލޭ އޮހޮރުވާލިއެވެ. އަދި އުމަވީ ޚިލާފަތުގެ އެންމެ ބޮޑު މިސްކިތަށް އޭނާ ސަވާރުވެ އިން އަހާއެކު ވަދެ އޭނާގެ ވަޒީރުންނާއެކު މަޖިލިސްކުރިއެވެ. އަދި ފަޚުރުވެރިކަމާއެކު ސުވާލުކުރިއެވެ. [އަހަރެންނާ ކުރިމަތިލައި މުޤާބަލާކުރަން ކެރޭނެ އެއްވެސް މީހަކު މިހާރު އެބަހުރިހެއްޔެވެ؟] ޖަވާބު ލިބުނެވެ. [ނޫނެކެވެ!] އޭނާ އަނެއްކާވެސް ސުވާލުކުރިއެވެ. [ތިމަންގެ މައްޗަށް އިޢުތިރާޟުކުރުމުގެ ހިތްވަރު ހުރި މީހަކު ހުރިކަން ކަލޭމެންނަށް އެނގޭ ހެއްޔެވެ؟] ވަޒީރުން ޖަވާބުދިނެވެ. [ނޫނެކެވެ. އާނ! އެކަމަކު ޖަވާބު ދިނުމުގެ ހިތްވަރު ކުރަންކެރޭނެނަމަ އެމީހަކީ އަޥްޒާޢީ އެވެ.]  ޢަބްދުﷲ ބިން ޢަލީ ޢައްބާސީ ވިދާޅުވިއެވެ. [ތިމަންގެ ކައިރިއަށް އަޥްޒާޢީ ގެންނާށެވެ!]